ຮູ້ຈັກກັບວິທີການປູກໝາກໂມໃຫ້ຜົນຜະລິດສູງ

ເຜີຍແຜ່ວັນທີ 04/12/2021

ໝາກ​ໂມ​ເປັນ​ຜັກ​ຕະ­ກູນ​ແຕງທີ່​ຄົນ​ເຮົາ​ຮູ້­ຈັກ​ກັນ​ດີ ແລະ ບໍ​ລິໂພກ​ກັນ​ມາ​ດົນ​ນານ​ແລ້ວ ນອກຈາກ​ນິ­ຍົມ​ບໍ­ລິ­ໂພກ​ໝາກ​ແລ້ວ, ສ່ວນ​ໝາກ​ອ່ອນ, ຍອດ​ອ່ອນ​ຍັງນຳ​ມາ​ໃຊ້​ໃນ​ການ​ປຸງ​ແຕ່ງ​ອາຫານ​ໄດ້​ຫລາຍ​ຊະ­ນິດ, ໝາກ​ໂມເປັນ​ພືດ​ທີ່​ປູກ​ໄດ້​ງ່າຍ, ສາ­ມາດປູກ​ໄດ້​ທົ່ວ​ທຸກ​ພາກ​ຂອງ​ປະ­ເທດ, ທຸກ​ລະ­ດູ​ການ​ຕະ­ຫລອດ​ປີ, ໝາກໂມ​ປູກ​ໄດ້​ກັບ​ດິນ​ເກືອບ​ທຸກ​ຊະ­ນິດ ແຕ່​ປູກ​ໄດ້​ດີ​ໃນ​ສະ­ພາບ​ດິນ​ລ້ວນປົນ​ຊາຍ ເຊິ່ງ​ມີ​ສະ­ພາບ​ຄວາມເປັນ​ກົດ ແລະ ດ່າງ​ປະ­ມານ 5,0-7,5  ລະ­ບາຍ​ນ້ຳ​ໄດ້​ດີ.

ເນື່ອງ​ຈາກໝາກ​ໂມ​ຈະ​ຂາດຕະ­ຫລາດ ແລະ ມີ​ລາ­ຄາ​ສູງ​ໃນຕອນ​ກາງ ແລະ ທ້າຍ​ລະ­ດູ­ຝົນເພາະ­ວ່າ​ໃນ​ໄລ­ຍະ​ດັ່ງ­ກ່າວ​ຈະ​ປູກໝາກ​ໂມ​ໄດ້​ຍາກ  ຍ້ອນ​ຕົ້ນໝາກໂມ​ບໍ່​ມັກ​ຝົນ ເຊິ່ງ​ຈະ​ຕາຍ​ຍ້ອນໂຣກ​ເທົາ​ຫຸ້ມ​ເປັນ​ສ່ວນ​ໃຫຍ່ ແລະ ເກີດ​ໂຣກ​ທາງ​ໃບ​ຫລາຍ, ໝາກ​ໂມ​ຈະ​ເນົ່າ​ງ່າຍ ແລະ ລົດຊາດ​ຈະ​ບໍ່​ຫວານ​ແຮງ​ຄື​ກັບ​ໝາກໂມ​ທີ່​ປູກ​ໃນ​ລະ­ດູ­ແລ້ງ ຫລື ຍາມໜາວ. ສະ­ນັ້ນ ຈິ່ງ​ຄວນ​ເລີ່ມ​ປູກໝາກ​ໂມ​ນັບແຕ່​ຕົ້ນ​ເດືອນ​ພະ­ຈິກໄປ​ຈົນ​ຮອດ​ເດືອນ​ມີ­ນາ ແລະ ເກັບກ່ຽວ​ຄັ້ງ​ສຸດ​ທ້າຍ​ໃນ​ເດືອນ​ມິ​ຖຸ​ນາ ເຊິ່ງ​ຍັງ​ເປັນຕົ້ນ​ລະ­ດູ­ຝົນ​ຢູ່.

ສຳ­ລັບ​ແນວ​ພັນ​ທີ່​ນິ­ຍົມ​ປູກ​ມີ 2 ແນວ​ພັນ​ຄື: ແນວ​ພັນ​ເບົາ​ທີ່​ຮູ້­ຈັກກັນໂດຍ​ທົ່ວ​ໄປ ​ເປັນໝາກ​ກົມ, ສີ­ຂຽວ​ຄ້ຳ, ມີ​ອາ­ຍຸ​ເກັບ​ກ່ຽວ 65 ວັນ​ນັບ​ຈາກ​ມື້​ງອກ ແລະ ອີກແນວ​ພັນໜຶ່ງ​ແມ່ນ​ພັນ​ໜັກ​ ເປັນໝາກ​ສີຂຽວ​ອ່ອນ, ມີ​ລາຍ​ຢູ່ໝາກ, ໜ່ວຍ​ກົມ​ຍາວ​ຂະໜາດໃຫຍ່, ອາ­ຍຸ​ເກັບ​ກ່ຽວ​ປະ­ມານ 70-75 ວັນ.
ໝາກ​ໂມ​ເປັນ​ພືດ​ຮາກ​ຢັ່ງ​ເລິກ ແລະ ຕ້ອງ­ການ​ດິນ​ທີ່​ອຸ­ດົມ­ສົມ­ບູນ, ມີ​ຄວາມ​ຊຸ່ມ​ຊື່ນ​ຫລາຍ. ສະນັ້ນ  ຖ້າ​ມີ​ການ​ໄຖ​ພວນ ຫລື ຂຸດ​ຍ່ອຍດິນ​ໃຫ້​ມີໜ້າ­ດິນ​ລ້ວນ​ໂປ່ງ ແລະ ເລິກ​ກໍ​ຈະ​ຊ່ວຍ​ປ້ອງ​ກັນ​ການ​ຂາດ​ນ້ຳ​ໄດ້​ເປັນ​ຢ່າງ​ດີ, ໃນ​ໄລ­ຍະ​ທີ່​ຕົ້ນໝາກ​ໂມ​ກຳ­ລັງ​ຈະ­ເລີນ​ເຕີບ​ໂຕ ການ​ກຽມ​ດິນ​ຈະ​ຊ່ວຍ​ເຮັດ​ໃຫ້​ດິນນັ້ນ​ຢືດ​ອົມ​ຄວາມ​ຊຸ່ມ​ໄດ້​ຫລາຍ​ຂຶ້ນ ແລະ ເປັນ​ການ​ເປີດ​ທາງ​ໃຫ້​ຮາກໝາກ​ໂມ​ຢັ່ງ​ລົງ​ໄປ​ພື້ນ​ດິນ​ ເຊິ່ງ​ຈະຊ່ວຍ​ໃຫ້​ຮາກ​ຫາ​ອາ­ຫານ ແລະ ນ້ຳ​ໄດ້​ກວ້າງ​ໄກ​ຍິ່ງ​ຂຶ້ນ ແລະ ເປັນການ​ຊ່ວຍ​ເຮັດ​ໃຫ້​ພືດ​ສາມາດໃຊ້​ນ້ຳ​ໃຕ້​ດິນ​ມາ​ເປັນ​ປະ­ໂຫຍດໄດ້​ດີ​ອີກ​ດ້ວຍ,  ຖ້າ​ຈຳ­ເປັນ​ຕ້ອງ​ປູກໝາກ​ໂມ​ໃນໜ້າ​ຝົນ​ຄວນ​ເລືອກປູກ​ໃນ​ດິນ​ທີ່​ມີ​ການ​ລະ­ບາຍ​ນ້ຳ​ດີ ເຊັ່ນ​ດິນ­ຊາຍ.

ການ​ປູກໝາກ​ໂມ​ສຳ­ລັບ​ພັນເບົາ​ໃນ​ອັດ­ຕາ​ສ່ວນ 40-50 ກຣາມ​ຕໍ່​ໄລ່ ແລະ ພັນ​ເຫລືອງອັດ­ຕາ 250-500 ກຣາມ​ຕໍ່​ໄລ່ ໂດຍ​ຢອດ​ເປັນ​ຂຸມ​ໃຫ້​ແຕ່​ລະ​ຂຸມໃນ​ແຖວ​ຫ່າງ​ກັນ 90 ຊັງ​ຕີ​ແມັດ, ສ່ວນ​ແຖວ​ຂອງ​ໝາກໂມ​ນັ້ນ​ຄວນໃຫ້​ຫ່າງ​ຈາກ​ກັນ​ເທົ່າ​ກັບ​ຄວາມຍາວ​ຂອງ​ເຄືອ​ແຕງ ຫລື ປະ­ມານ 2-3 ແມັດ​ໃນ​ດິນ­ຊາຍ, ຂຸດ​ຂຸມໃຫ້​ມີ​ຄວາມ​ກວ້າງ ແລະ  ຍາວ 50 ຊັງ​ຕີ​ແມັດ, ເລິກ 15 ຊັງ​ຕີ, ຖ້າ​ເປັນ​ດິນ​ໜຽວ​ຂຸດ​ຂຸມ​ໃຫ້​ເລິກ 10 ຊັງ​ຕີ​ແມັດ, ໃຊ້​ຝຸ່ນ​ຄອກ​ຮອງກົ້ນ​ຂຸມໆ​ລະ 4-5 ກຣາມ, ກຽມຂຸມ​ປະ​ໄວ້ 1 ວັນ ແລ້ວ​ຈິ່ງ​ລົງ­ມື​ປູກຢອດ​ຂຸມ​ລະ 5 ແກ່ນ.

ເມື່ອ​ຢອດ​ແກ່ນ​ແລ້ວ​ຕ້ອງຫົດ​ນ້ຳ​ໃຫ້​ຊຸ່ມ, ຫລັງ​ທີ່ໝາກ​ໂມຂຶ້ນ​ມີ​ໃບ 2-3 ໃບ, ຖອນ​ແຍກ​ໃຫ້ເຫລືອ​ຂຸມ​ລະ 2-3 ຕົ້ນ ໂດຍຄັດ​ເອົາ​ແຕ່​ຕົ້ນ​ທີ່​ແຂງ­ແຮງ​ໄວ້ແຕ່​ຖ້າ​ປູກ​ໃຫ້​ຕົ້ນ​ຫ່າງ​ກັນ 90 ຊັງ​ຕີ​ແມັດ ແລະ ແຖວ​ຫ່າງ​ກັນ 3 ແມັດ ແລ້ວ​ກໍໃຫ້​ເຫລືອ​ຂຸມ​ລະ 3 ຕົ້ນ​ໄດ້, ລວມ​ແລ້ວ​ໃນ​ເນື້ອ­ທີ່ 1 ໄລ່​ຈະ​ມີ​ຕົ້ນ​ໝາກໂມ​ຢູ່​ປະ­ມານ 1.700 ຕົ້ນ.

ສຳ­ລັບການ​ໃຫ້​ຝຸ່ນ​ແກ່​ໝາກໂມ​ຖື​ວ່າ​ສຳ­ຄັນ​ຫລາຍ ​ໂດຍ​ສະເພາະ​ແມ່ນ​ຝຸ່ນ​ຄອກ ເພາະ​ຝຸ່ນຄອກ​ຈະ​ຊ່ວຍ​ເຮັດ​ໃຫ້​ດິນ​ລ້ວນໂປ່ງ, ຊ່ວຍ​ເຮັດ​ໃຫ້​ດິນ​ມີ​ທາດ​ອາຫານ​ຫລາຍ​ຂຶ້ນ ແລ້ວ​ຍັງ​ຊ່ວຍ​ໃຫ້ປຸ໋ຍ​ວິ­ທະຍາ­ສາດ​ຢຸດ​ຢູ່​ໃນ​ສະ­ພາວະ​ສົມ​ດຸນ​ເປັນ​ປະ­ໂຫຍດ​ຕໍ່​ພືດຫລາຍ​ຂຶ້ນ​ອີກ ເຊິ່ງ​ຄວນ​ໃສ່​ຝຸ່ນຄອກ​ໃນ​ພຶ້ນ​ທີ່​ປູກ​ຕົວ​ຈິງ​ອັດ­ຕາສ່ວນ 2-4 ໂຕນ​ຕໍ່​ໄລ່, ຖ້າ​ເປັນຝຸ່ນ­ວິ­ທະ­ຍາ­ສາດ​ໃສ່​ໃນ​ອັດ­ຕາ 1/2  ເຊິ່ງ​ໄດ້­ແກ່​ປຸ໋ຍ​ວິທະ­ຍາ­ສາດ 10-10-20 ເປັນ­ຕົ້ນ ຫລື ໃສ່ສູດ​ໃກ້​ຄຽງ​ເຊັ່ນ​ສູດ 13-13-21.

ຢ່າງ­ໃດ​ກໍ​ຕາມ, ​ຕັດ­ສິນ​ໃຈ​ໃສ່ປຸ໋ຍ​ຫລາຍ ຫລື ໜ້ອຍ​ກໍ​ຕ້ອງ​ເບິ່ງຄວາມ​ອຸ­ດົມ­ສົມ­ບູນ​ຂອງ​ດິນ ແລະ ລາ­ຄາໝາກ​ໂມ​ປະ­ກອບ​ນຳ, ສ່ວນປົກ­ກະ­ຕິ​ແລ້ວ​ຈະ​ໃສ່​ປຸ໋ຍ​ວິ­ທະ­ຍາສາດ​ປະ­ມານ 120-150 ກິ​ໂລ​ຕໍ່ໄລ່​ຕໍ່​ລະ­ດູ​ການ.

ເມື່ອ​ໝາກ​ໂມ​ອອກ­ດອກ ແລະ ມີ​ດອກ​ຕົວ​ແມ່​ຂອງ​ໝາກ​ໂມ​ທີ່​ໄດ້​ຮັບ​ການ​ປະ­ສົມ​ເກ­ສອນ​ຢ່າງ​ສົມບູນກໍ​ຈະ­ເລີນ​ເຕີບ​ໂຕ​ຢ່າງ​ສະໝໍ່າສະ­ເໝີ​ຕິດ­ຕໍ່​ກັນ​ໄປ​ວັນ​ຕໍ່​ວັນ, ເມື່ອ​ໝາກ​ໂມ​ມີ​ຂະໜາດ​ເທົ່າ​ກັບໝາກ­ພ້າວ​ຄວນ​ເອົາ​ເຟືອງ​ຮອງກ້ອງໝາກເພື່ອ​ບໍ່​ໃຫ້ໜ່ວຍໝາກໂມ​ສຳ­ຜັດ​ກັບ​ດິນ​ໂດຍ​ກົງ, ຄວນຈະ​ປິ້ນ​ກັບ​ໝາກ­ແຕງ­ໂມ​ໃຫ້​ດ້ານທີ່​ສຳ­ຜັດ​ກັບ​ເຟືອງ​ຖືກ​ແສງ​ແດດກ່ອນ​ເກັບ​ກ່ຽວ 10 ວັນ ເພື່ອໃຫ້​ໝາກ­ແຕງ­ໂມ​ມີ​ຄວາມ​ສະໝໍ່າ​ສະ­ເ​​ໝີ​ທົ່ວ​ທັງໜ່ວຍ ແລະ ໝາກໂມ​ມີ​ລົດ​ຊາດ​ຫວານຫລາຍ​ຂຶ້ນ​ອີກ.

Footer Image
error: