ອັນຕະລາຍຈາກການນັ່ງເຮັດວຽກດົນ (ພະນັກງານຫ້ອງການຄວນອ່ອນ)

ເຜີຍແຜ່ວັນທີ 12/02/2022

ຜົນການວິໄຈການແພດຫລ້າສຸດເປີດເຜີຍວ່າ: ການນັ່ງໂດຍບໍ່ຫຍັບຍ້າຍເຄື່ອນໄຫວຮ່າງກາຍເປັນເວລາດົນໆ ສ່ຽງຕໍ່ສຸຂະພາບເຖິງຂັ້ນຊີວິດ ພ້ອມແນະນຳໃຫ້ລຸກຂຶ້ນຍ່າງໃນໄລຍະເວລາເຮັດວຽກຢ່າງໜ້ອຍ 2 ຊົ່ວໂມງຕໍ່ມື້.

ໜັງສືພິມ ອິນດີເພນເດັນ ຂອງອັງກິດ ໄດ້ລາຍງານຜົນການວິໄຈຈາກວາລະສານແພດສາດການກິລາຂອງອັງກິດ ເຊິ່ງວິໄຈໂດຍທີມນັກວິໄຈຈາກອັງກິດ, ອາເມລິກາ ແລະ ອົດສະຕຣາລີ ນຳໂດຍ ດຣ. ຈອນ ບັດລີ ຈາກສະຖາບັນການແພດ ມະຫາວິທະຍາໄລເຊດເຕີ້ ຂອງອັງກິດ ທີ່ໄດ້ມີການວິໄຈພຶດຕິກຳການເຮັດວຽກຂອງພະນັກງານປະຈຳໃນຫ້ອງການທີ່ສຳພັນກັບສຸຂະພາບ ພົບວ່າບັນຫາສຸຂະພາບທີ່ເກີດຂຶ້ນກັບຄົນທີ່ນັ່ງເຮັດວຽກໃນຫ້ອງການນັ້ນ ເກີດຈາກການນັ່ງດົນເກີນຄວາມຈຳເປັນ.

ໂດຍຜົນການວິໄຈໃຫ້ລາຍລະອຽດວ່າ: ການນັ່ງໂດຍບໍ່ມີການເຄື່ອນໄຫວອື່ນໃດຈະມີຄວາມສ່ຽງສູງຕໍ່ການເຈັບປ່ວຍຂອງຮ່າງກາຍທີ່ກ່ຽວກັບລະບົບການເຜົາຜານຂອງຮ່າງກາຍ ເຊິ່ງສ່ຽງເຖິງຂັ້ນເສຍຊີວິດກ່ອນໄວອັນຄວນໄດ້ ເຊິ່ງຄົນອັງກິດສ່ວນຫລາຍໃຊ້ເວລາສູງເຖິງ 60% ຕໍ່ມື້ໄປກັບການນັ່ງ.

ການວິໄຈຄັ້ງນີ້ໄດ້ໃຫ້ຄຳແນະນຳວ່າ: ພະນັກງານຄວນປັບປ່ຽນພຶດຕິກຳຈາກການນັ່ງມາເປັນການຢືນ ຫລື ຍ່າງແບບຊ້າໆລະຫວ່າງເວລາເຮັດວຽກຢ່າງໜ້ອຍ 2 ຊົ່ວໂມງຕໍ່ມື້ ຫລື ດີທີ່ສຸດຄື 4 ຊົ່ວໂມງສຳລັບຄົນທີ່ນັ່ງຕັ່ງເຮັດວຽກເປັນຫລັກ ຫລື ປັບປ່ຽນການເຮັດວຽກທີ່ສາມາດເຮັດໄດ້ບໍ່ວ່າຢືນ ຫລື ນັ່ງເຊັ່ນ: ໂຕະເຮັດວຽກສຳລັບຢືນ ຫລື ນັ່ງເທິງໝາກບານໂຢຄະ ເຊິ່ງຊ່ວຍໃນການບໍລິຫານກ້າມຊີ້ນຫລັກ ລວມທັງການຄວບຄຸມອາຫານຢ່າງສະໝໍ່າສະເໝີ ແລະ ທີ່ສຳຄັນ ນາຍຈ້າງຕ້ອງເຕືອນພະນັກງານທຸກຄົນເຖິງອັນຕະລາຍຈາກການນັ່ງເຮັດວຽກດົນໆ ບໍ່ວ່າໃນບ່ອນເຮັດວຽກ ຫລື ຢູ່ເຮືອນ.

ທັງນີ້ ໂຕະເຮັດວຽກແບບຢືນກຳລັງເປັນທີ່ນິຍົມຫລາຍໃນປັດຈຸບັນ ເຖິງຢ່າງໃດກໍຕາມ, ຖືວ່າບໍ່ແມ່ນສິ່ງປະດິດໃໝ່ ເພາະທັງວິນຕັນ ເຊີຊິນ ອະດີດລັດຖະມົນຕີອັງກິດ, ລີໂອນາໂດ້ ດາວິນຊີ ສິລະປິນເອກຍຸກເຣເນຊອງ, ເບນຈາມິນ ແຟຣງຄລິນ ແລະ ເອີເນດ ເຮມມິງເວ ລ້ວນແຕ່ເຄີຍເຮັດວຽກດ້ວຍໂຕະແບບຢືນມາແລ້ວ.

Footer Image
error: