ວິທີການປູກຫມາກອຶແບບປອດໄພ

ເຜີຍແຜ່ວັນທີ 09/12/2021

ຫມາກ­ອຶ ຈັດ​ເປັນ​ພືດ​ໃນ​ຕະ­ກຸນ​ຫມາກ­ແຕງ​ທີ່​ໃຫ້​ປະ­ໂຫຍດຫລາຍ​ຢ່າງ​ເຊັ່ນ: ຫມາກ­ອຶ​ຈະ​ມີ​ກາກ​ໄຍ​ສູງ​ທີ່​ອຸ­ດົມ​ໄປ​ດ້ວຍ​ວິ­ຕາ­ມິນ​ເອ ແລະ ສານ​ຕໍ່­ຕ້ານ​ການ​ປະສົມ​ກັບ​ອອກ​ຊີ​ເຈນ​ກັບ​ເກືອ​ແຮ່ ແລະ ມີ​ກົດ​ໂປຣ​ໄພ​ໂອ​ນິກ, ເປັນກົດ​ທີ່​ເຮັດ​ໃຫ້​ເຊວ​ມະ​ເຮັງ​ອ່ອນລົງ ເຊິ່ງ​ຈະ​ພົບ​ເຫັນ​ໃນ​ແກ່ນ, ຮາກ, ກ້ານ, ນ້ຳ­ມັນ​ຈາກ​ແກ່ນ ແລະ ໄຍ​ກາງ​ຫນ່ວຍ. ຫມາກ­ອຶ​ເປັນ​ພືດ​ທີ່​ຄົນ​ສ່ວນ​ຫລາຍ​ນິ­ຍົມ​ບໍ­ລິ­ໂພກ, ມີ​ຂະຫນາດ​ນ້ຳຫນັກ​ຫນ່ວຍ​ຫນຶ່ງ​ສະ­ເລ່ຍ 2-3 ກິ​ໂລກ​ຣາມ, ເປືອກ​ມີ​ສີ­ຂຽວຄ້ຳ, ຮ່ອງ​ຫມາກ​ເປັນ​ພູ​ສະ​ຫມ່ຳສະ­ເຫມີ ຫລື ເປືອກ​ແບບ​ຫນັງຄັນ­ຄາກ, ເນື້ອ​ສີ​ເຫລຶອງ​ຫນາ ແລະ ຫນຽວ.

ພັນ​ຫມາກ­ອຶ​ທີ່​ຊາວ​ກະ​ສິກອນ​ນິ­ຍົມ​ປູກ​ເປັນ​ສິນ­ຄ້າ​ສ່ວນໃຫຍ່​ຈະ​ຊື້​ພັນ​ລູກ​ປະ­ສົມ​ທີ່​ມີ​ລາຄາ​ແພງ, ໃຫ້​ຜົນ​ຜະ­ລິດ​ສູງ​ແຕ່​ບໍ່​ສາ­ມາດ​ເກັບ​ແກ່ນ​ໄວ້​ເຮັດ​ແນວພັນ​ຕໍ່​ໄດ້. ໃນ​ຂະ­ນະ​ທີ່ອີກ​ກຸ່ມຫນຶ່ງ​ເປັນ​ພັນ​ຫມາກອຶ​ທີ່​ໄດ້​ຈາກການ​ປະ­ສົມ​ປ່ອຍ ແລະ ໄດ້​ມີການ​ຄັດ​ເລືອກ​ພັນ​ຈົນ​ມີ​ຄວາມ​ລະ­ອຽດ​ລະ­ດັບ​ຫນຶ່ງ​ເມື່ອ​ປູກ​ໄປ​ແລ້ວ​ສາ­ມາດ​ເກັບ​ແກ່ນ​ໄວ້​ເຮັດແນວ​ພັນ​ຕໍ່​ໄດ້.

ສຳ­ລັບ​ວິ­ທີ​ການ​ປູກ​ຫມາກອື​ແບບ​ປອດ​ສານ​ເຄ​ມີ ​ລວມທັງ​ສັດ­ຕູ​ພືດເລີ່ມ​ຕົ້ນ​ຈາກ​ການປັບ­ປຸງ​ດິນ​ໃຫ້​ມີ​ຄຸນ​ນະ​ພາບ​ດີ ໂດຍ​ໃຊ້​ປຸຍ​ຫມັກ​ຊີ­ວະ​ພາບ, ການ​ປົກ​ດິນ​ດ້ວຍ​ວັດ​ສະ​ດຸ​ຈາກທຳ​ມະ​ຊາດ​ເຊັ່ນ: ເຟືອງ​ເຂົ້າ, ຊາກ​ພືດ ແລະ ສັດ​ທີ່​ຜຸ​ພັງ, ມີ​ການ​ປູກ​ພືດ​ຫມູນ­ວຽນ​ເພື່ອຫລຸດ​ການ​ລະ­ບາດ​ຂອງ​ສັດ­ຕູ​ພືດ ແລະ ມີ​ການ​ອະ­ນຸ​ຮັກ​ແມງ­ໄມ້​ທີ່​ເປັນ​ປະ­ໂຫຍດ, ການ​ຫົດ​ນ້ຳ​ປຸຍ​ຫມັກ​ຊີ­ວະ​ພາບ​ລົງ​ໃນ​ດິນ​ທີ່ໃຊ້​ປູກ​ຫມາກ­ອຶ​ຈະ​ເປັນ​ການ​ເພີ່ມປະ­ລິ­ມານ, ຈຸ​ລິນ​ຊີ​ໃຫ້​ແກ່​ດິນ​ບໍລິ​ເວນ​ຮາກ​ພືດ, ຈຸ​ລິນ​ຊີ​ຈະ​ໃຊ້​ອາຫານ​ຈາກ​ປຸຍ​ຫມັກ​ຊີ­ວະ​ພາບ ແລະ ດຶງ​ໄນ​ໂຕຣ​ເຈນ​ຈາກ​ອາກາດ​ໄດ້.

ໃນ​ການ​ກຽມ​ພື້ນ​ທີ່​ປູກຫມາກ­ອຶ, ຊາວ​ສວນ​ຈະ​ຕ້ອງກຳ​ໄດ້​ເຖິງ​ສະ­ພາບ​ຄວາມ​ເປັນກົດ-ດ່າງ​ຂອງ​ດິນ, ຖ້າ​ດິນ​ມີຄ່າ pH ຕ່ຳ​ກວ່າ 5,5 ຈະຕ້ອງ​ໃສ່​ປູນ​ຂາວ ຫລື ປູນ​ໂດໂລ​ໂມ​ອັດ­ຕາ 100-200 ກິ​ໂລກຣາມ​ຕໍ່​ໄລ່ ແລະ ຈະ​ຕ້ອງ​ໃສ່​ກ່ອນ​ລົງ­ມື​ປູກ​ຢ່າງ​ນ້ອຍ 1 ອາ­ທິດ. ຫລັງ​ຈາກ​ນັ້ນ​ໃຫ້​ໄຖ​ພວນ​ປະ­ສົມ​ຄົນ​ໃຫ້​ປູນ​ປະ­ສົມ​ເຂົ້າ​ກັບ​ດິນ ແລະ ຕາກ​ດິນ​ປະ​ໄວ້, ສ່ວນການ​ໄຖ​ພວນ​ຕາກ​ດິນ​ຄວນ​ໃຫ້​ມີ​ຄວາມ​ເລິກ​ຢ່າງ​ນ້ອຍ 30 ຊັງຕີ​ແມັດ.

ສິ່ງ​ສຳ­ຄັນ​ອີກ​ຢ່າງ​ຫນຶ່ງ​ທີ່​ຊາວ​ສວນ​ຜູ້​ປູກ​ຫມາກ­ອຶ​ຄວນ​ຄຳ­ນຶງຄື: ຕົ້ນ​ຫມາກ­ອຶ​ຈະ​ມີ​ການ​ຈະເລີນ​ເຕີບ​ໂຕ​ໄດ້​ດີ​ທີ່​ອຸນ­ຫະ­ພູມສະ­ເລ່ຍ 18-27 ອົງ­ສາ, ຈັດເປັນ​ພືດ​ຜັກ​ທີ່​ບໍ່​ທົນ​ຕໍ່​ສະ­ພາບ​ອາກາດ​ທີ່​ຫນາວ​ເຢັນ​ຈັດ, ພົບ​ວ່າຕົ້ນ​ຫມາກ­ອຶ​ຈະ​ສະ​ງັກ​ການ​ຈະເລີນ​ເຕີບ​ໂຕ​ໃນ​ສະ­ພາບ​ອຸນ­ຫະພູມ​ຕ່ຳ​ກວ່າ 10 ອົງ­ສາ​.
ຫລັງ​ຈາກ​ທີ່​ເພາະ​ກ້າ­ແກ່ນຫມາກ­ອຶ​ໃນ​ຖາດ​ເພາະ​ກ້າ​ດົນປະ­ມານ 10-13 ວັນ ຫລື ເມື່ອ​ຕົ້ນ​ຫມາກ​ອື​ມີ​ໃບ​ແທ້ 1-2 ໃບ​ຈິ່ງ​ທຳ​ການ​ຍ້າຍ​ໄປ​ປູກ, ປັດ­ຈຸ​ບັນ​ການ​ປູກ​ຫມາກ­ອຶ​ຈະ​ມີເຕັກ​ໂນ​ໂລ​ຊີ​ສະໄຫມ​ໃຫມ່​ທີ່​ມີຄວາມ​ປອດ​ໄພ​ຕໍ່​ຊາວ​ກະ­ສິ­ກອນ ແລະ ສິ່ງ­ແວ­ດລ້ອມ​ດ້ວຍ​ການ​ຮອງ​ກົ້ນ​ຂຸມ​ດ້ວຍ​ສານ​ສະ​ຕາເກິນ​ຈີໃນ​ອັດ­ຕາ 2 ກຣາມ​ຕໍ່​ຂຸມ. ການ​ຈະ­ເລີນ​ເຕີບ​ໂຕ​ຂອງ​ຕົ້ນ​ກ້າ ຫລື ຕົ້ນ​ຫມາກ­ອຶ​ທີ່​ມີ​ຄວາມ​ສູງປະ­ມານ 20-30 ຊັງ​ຕີ​ແມັດ ​ສານສະ​ຕາ​ເກິນ​ຈີ​ຈະ​ຊ່ວຍ​ປ້ອງ​ກັນ​ການ​ທຳ­ລາຍ​ຂອງ​ແມງ​ປາກດຸດ​ທຸກ​ຊະ­ນິດ ລວມ​ໄປ​ຮອດ​ກຳຈັດ​ສັດ­ຕູ​ພືດ​ທີ່​ເຂົ້າ​ມາ​ທຳ­ລາຍໃບ​ຫມາກ­ອຶ​ໄດ້​ອີກ​ດ້ວຍ, ການປູກ​ຫມາກ­ອຶ​ແນະ­ນຳ​ໃຫ້​ໃຊ້​ໄລຍະ​ປູກ​ລະ­ຫວ່າງ 1 ແມັດ​ຕໍ່​ຕົ້ນ, ໄລ­ຍະ​ຫ່າງ​ລະ­ຫວ່າງ​ແຖວ 4 ແມັດ​ໃນ​ພື້ນ​ທີ່ 1 ໄລ່​ຈະ​ປູກ​ໄດ້​ປະມານ  400 ຕົ້ນ.

ສ່ວນ​ການ​ເບິ່ງ­ແຍງ​ຮັກ­ສາ ແລະ ໃສ່​ປຸຍ: ເມື່ອ​ຕົ້ນ​ກ້າ​ງອກຈະ​ມີ​ໃບ​ແທ້ 2-3 ໃບ​ແລ້ວ​ຄວນແຍກ​ຕົ້ນ​ທີ່​ບໍ່​ສົມ­ບູນ​ອອກ​ໄປເຫລືອ​ແຕ່​ຕົ້ນ​ທີ່​ສົມ­ບູນ​ແຂງແຮງ​ຂຸມ​ລະ 2 ຕົ້ນ ແລະ ຫົດ​ນ້ຳທຸກ​ວັນ, ເມື່ອ​ຕົ້ນ​ກ້າ​ໃຫຍ່​ຈົນ​ມີໃບ​ແທ້ 4 ໃບ, ແມ່ນ​ໃຫ້​ໃສ່ປຸຍ​ແອມ​ໂມ​ນຽມ​ຊັນ​ເຟດ ຫລື ປຸຍ​ຜັກ (21-0-0) ລະ­ລາຍ​ນ້ຳແລ້ວ​ໃຊ້​ຫົດ​ຕົ້ນ​ຫມາກ­ອຶ, ຕ້ອງຫົດ​ນ້ຳ​ທຸກ​ວັນ. ເມື່ອ​ຫມາກ­ອຶເລີ່ມ​ອອກ­ດອກ​ໃສ່​ປຸຍ​ເຄ​ມີ​ສູດ 15-15-15 (ຫລື ສູດ​ໃກ້ຄຽງ​ກັນ​ເຊັ່ນ: 13-13-27 ຫລື 14-14-21) ໂຮຍ​ຮອບໆຕົ້ນ​ແລ້ວ​ຫົດ​ນ້ຳ​ຕາມ ແລະ ໃສ່ປຸຍ​ອີກ​ຄັ້ງ​ເມື່ອ​ຫມາກ​ອື​ເລີ່ມ​ເປັນຫມາກ​ນ້ອຍ, ການ​ຫົດ​ນ້ຳ​ແມ່ນຕ້ອງ​ຫົດ​ນ້ຳ​ທຸກ​ວັນ​ຈົນ​ກວ່າຮອດ​ໄລຍະ​ກ່ອນ​ເກັບ​ກ່ຽວ 15 ວັນ​ໄດ້​ຈິ່ງ​ເຊົາ.

Footer Image
error: